விழுப்புரம் அரசு மாதிரி மகளிர் மேல்நிலைப்பள்ளியில் டிசம்பர் 12, செவ்வாய்க் கிழமையன்று உணவுப்பொருள் வழங்கல் மற்றும் நுகர்வோர் பாதுகாப்புத் துறையின் சார்பில், சர்வதேச சிறுதானிய உணவு திருவிழாவினை மாவட்ட ஆட்சித்தலைவர் டாக்டர் சி.பழனி இ.ஆ.ப., துவக்கி வைத்து, சிறுதானிய உணவு களை பார்வையிட்டார்.
மாவட்ட ஆட்சித்தலைவர் அவர்கள் தெரிவிக்கையில், ஐக்கிய நாடுகள் சபை 2023-ஆம் ஆண்டினை சர்வதேச சிறுதானியங்கள் ஆண்டாக அறிவித்தது. அதனடிப்படையில் தமிழ்நாடு அரசு பொது மக்களாகிய நுகர்வோர்களிடையே பாரம்பரிய உணவான சிறுதானியங்கள் குறித்து விழிப்புணர்வு ஏற்படுத்திடும் வகையில் அனைத்து மாவட்டங்களிலும் சிறுதானிய உணவுத் திருவிழா நடத்திட அறுவுறுத்தப்பட்டது. அதன்படி நேற்றயதினம் சர்வதேச சிறுதானிய உணவுத் திருவிழா மற்றும் கண்காட்சி அரங்குகள் துவக்கி வைத்து பார்வையிடடார்.
இக்கண்காட்சியில் சிறுதானிய உணவின் நன்மைகள், பலன்கள் குறித்த விவரங்களுடன் சிறுதானிய உணவுகளை சிறப்பாக தயார் செய்து உரிய குறிப்புகளுடன் பொதுமக்களாகிய நுகர்வோருக்கு விழிப்புணர்வு ஏற்படுத்தும் வகையில் அரசுத்துறைகள், மகளிர் சுயஉதவிக்குழுக்கள், தன்னார்வ நுகர்வோர் அமைப்புகள் மற்றும் பள்ளி, கல்லூரிகளில் செயல்படும் குடிமக்கள் நுகர்வோர் மன்றங்கள் ஆகிய அமைப்புகளால் 15-க்கும் மேற்பட்ட அரங்குகள் காட்சிப்படுத்தப்பட்டது.
இக்கண்காட்சியில், ஒருங்கிணைந்த குழந்தை வளர்ச்சிப் பணிகள், நுகர்வோர் பாதுகாப்புத்துறை, மகளிர் திட்டம், பள்ளிக்கல்வித்துறை, வேளாண்மைத்துறை, வேளாண் வணிகம் மற்றும் விற்பனைத்துறை, உணவு பாதுகாப்புத்துறை உள்ளிட்ட பல்வேறு துறைகளின் சார்பில் அரங்குகள் அமைக்கப்பட்டு, சிறுதானிய உணவுகள் காட்சிப்படுத்தப்பட்டிருந்தது.
மேலும், சிறுதானிய உணவு அரங்கில் வைக்கப்பட்டிருந்த பல்வேறு சிறுதானிய உணவு வகைகளை ஆட்சியர் பழனி சுவைத்து பார்த்து ஆய்வு செய்தார். இந்த அரங்குகளில், குதிரைவாலி, சாமை, கருப்பு கவுனி அரிசி, வரகு, பனிவரகு வெண்பொங்கல், பனிவரகு அப்பம், பனிவரகு வாழைப் பூ வடை, பனிவரகு கிச்சடி, தினைப் பனியாரம், தினை பொங்கல், தினை அடை, தினை கிச்சடி, தினை லட்டு உள்ளிட்ட பல்வேறு சிறுதானிய உணவுகள் கண்காட்சி அரங்குகளில் வைக்கப்பட்டு பொதுமக்களிடையே விழிப்புணர்வு ஏற்படுத்தப்பட்டது.
சிறுதானியத்தின் பயன்களை அறிந்தே ஒவ்வொரு அங்கன்வாடி மையத்திலும், சிறுதானியங்களால் தயாரிக்கப்பட்ட உணவுகளையே குழந்தைகளுக்கு வழங்குவதால், குழந்தைகள் ஆரோக்கியமாகவும், சுறுசுறுப்பாகவும் உள்ளனர். எனவே, பெற்றோர்களும் தங்கள் குழந்தைகளுக்கு சிறுதானிய உணவுகளை நாள்தோறும் கட்டாயம் வழங்கிட வேண்டும்.
இந்த சிறுதானிய உணவுகளின் மூலம் வைட்டமின்-பி, புரதம், எலும்பு மற்றும் பற்கள் வலுவடையும் இரும்பு சத்து, கால்சியம், நார்சத்து, புரோட்டீன், மெக்னீசியம் உள்ளிட்ட பல்வேறு சத்துகள் சிறுதானிய உணவுகளில் கிடைக்கிறது. சிறுதானியங்களால் தயாரிக்கப்பட்ட உணவுகளை உண்பதால் நீரிழிவு நோய், இரத்த அழுத்தம் போன்ற பாதிப்புகள் வராமல் தடுக்கலாம். மேலும், இந்த உணவு வகைகள் உடல் இயக்கத்திற்கு வலு சேர்க்க உதவுகிறது. எனவே அனைவரும் சிறுதானிய உணவுகளின் பயன்களை நன்கு அறிந்துகொண்டு பயன்படுத்தி, அதனை மற்றவர்களுக்கும் எடுத்து கூறவேண்டும் என மாவட்ட ஆட்சியர் டாக்டர் சி.பழனி தெரிவித்தார்.
தொடர்ந்து சிறுதானிய உணவுகள் சிறப்பு குறித்து விழிப்புணர்வு உரையாற்றிய பள்ளி மற்றும் கல்லூரி மாணவ, மாணவியர்களுக்கு கேடயம் மற்றும் பாராட்டுச்சான்றிதழ்களை மாவட்ட ஆட்சியர் பழனி வழங்கினார்.
இந்நிகழ்ச்சியில், மாவட்ட வழங்கல் அலுவலர் மு.சந்திரசேகர், மாவட்ட முதன்மைக் கல்வி அலுவலர் ரெ.அறிவழகன், வேளாண்மைத்துறை இணை இயக்குநர் கணேசன், ஒருங்கிணைந்த குழந்தை வளர்ச்சி திட்ட அலுவலர் கோ.அன்பழகி உட்பட துறை சார்ந்த அலுவலர்கள் கலந்து கொண்டனர்.
செய்தியாளர்: மதியழகன்.
கருத்துரையிடுக